Մեծ Բրիտանիան նոր պատժամիջոցներ է սահմանել Ռուսաստանի դեմ

Մեծ Բրիտանիան ընդլայնել է Ռուսաստանի դեմ իր պատժամիջոցները։ Թարմացված ցանկը հրապարակվել է Մեծ Բրիտանիայի կառավարության կայքում։ Փաստաթղթի համաձայն՝ պատժամիջոցներն ուղղված են 23 կազմակերպության, երեք անհատի և 12 նավթատար նավի։

Մեծ Բրիտանիան ընդլայնել է «Ռոստեխ»-ի դեմ պատժամիջոցները և ավելացրել է «Զարուբեժնեֆտ» նավթագազային ընկերությունը, Իրկուտսկի նավթային ընկերության INK-Capital կառավարիչ ընկերությունը, ինչպես նաև մի քանի ընկերություններ Թուրքիայից, Չինաստանից և Թաիլանդից, որոնք «ներգրավված են Ուկրաինայի անկայունացման կամ Ուկրաինայի տարածքային ամբողջականության, ինքնիշխանության կամ անկախության խաթարման կամ սպառնալիքի մեջ՝ Ռուսաստանին ապրանքներ կամ տեխնոլոգիաներ մատակարարելով»։

Ցուցակում նաև ներառված են Ղրղզստանից երեք և Կանադայից մեկ ընկերություններ։ Նշվում է, որ նրանք «ներգրավված են Ռուսաստանի կառավարությունից օգուտներ ստանալու կամ ֆինանսական գործարքների միջոցով աջակցելու մեջ»։

Մեծ Բրիտանիան վերջին անգամ պատժամիջոցներ է սահմանել Ռուսաստանի դեմ մեկ շաբաթ առաջ՝ հոկտեմբերի 1-ին։ Այդ ժամանակ սահմանափակումներ են սահմանվել 23 ֆիզիկական և իրավաբանական անձանց և 8 նավերի նկատմամբ, որոնցից մի քանիսը պատկանում են Ռուսաստանի «ստվերային նավատորմին»։

Նոր ցուցակում ընդգրկվածների թվում են Ռուսաստանի նախագահ Վլադիմիր Պուտինի խորհրդական և չճանաչված Հարավային Օսիայի նախկին ղեկավար Ալան Գագլոևը, Հարավային Օսիայի նախագահ Մարատ Կամբոլովը, «Առաջինների շարժման» խորհրդի նախագահ Արթուր Օրլովը, ԱԴԾ սպա Յան Զանևսկին և այլք։