ԱՄՆ-ում երեկույթի ժամանակ տեղի ունեցած հրաձգության հետևանքով 2 մարդ զոհվել է, 35-ը՝ վիրավորվել

ԱՄՆ-ի Ջորջիա նահանգի հարավային հատվածում փողոցային երեկույթի ժամանակ տեղի ունեցած հրաձգության հետևանքով երկու մարդ զոհվել է, ևս 35-ը՝ վիրավորվել, հայտնում է CBS News-ը։

Ջորջիայի հետաքննությունների բյուրոյի (GBI) տվյալներով՝ միջադեպը տեղի է ունեցել կիրակի առավոտյան։ Երկու զոհերին հայտնաբերել են դեպքի վայրից մի քանի թաղամաս հեռու՝ այն վայրից, որը համարվում է հրաձգության սկզբնական կետը։

Դուլի շրջանի շերիֆ Քրեյգ Փիվին հայտնել է, որ շրջանավարտներին նվիրված երեկույթին ներկա է եղել ավելի քան 1000 մարդ։ Նրա խոսքով՝ երկու վայրերում, որոնք միմյանցից մոտ մեկ թաղամաս հեռավորության վրա են գտնվել, արձակվել է առնվազն 50 կրակոց։ Նա նաև նշել է, որ մարդկանց մի մասը վիրավորվել է, երբ մեքենաները փորձել են լքել տարածքը։

Հնարավոր կասկածյալների և միջադեպի դրդապատճառների մասին տեղեկություններ չեն հրապարակվում։