Նիկոլ Փաշինյանի ելույթը՝ «Աղոթքի նախաճաշ» միջոցառման պաշտոնական ընթրիքի ժամանակ

Վարչապետ Նիկոլ Փաշինյանը ֆեյսբուքյան էջում հրապարակել է տեսանյութ՝ կից գրառմամբ․ «Ելույթ եմ ունենում Հայաստանի աղոթքի երկրորդ նախաճաշի գալա ընթրիքին»։

«Մեր անկախությունից ի վեր Հայաստանի հարյուրավոր եկեղեցիներում տասնյակ հազարավոր անգամներ խաղաղության ակնկալիքով աղաչանքներ են հնչել առ Աստված։ Իսկ ինչո՞ւ չենք ունեցել խաղաղություն»,- իր ելույթում նշել է Նիկոլ Փաշինյանը և հավելելո, որ այս հարցի պատասխանը գտել է «Անդամալույծի բժշկումն» առակում:

«Մենք հասկացել ենք, որ պետք է վեր կենանք և քայլենք, որովհետև նույնիսկ Աստծո օգնությամբ ոչ ոք մեր փոխարեն վեր չի կենա և չի քայլի։ Ես շնորհակալ եմ Աստծուն, որ գործնականում ամեն օր, ամեն առավոտ ինձ ասում է՝ «վեր կաց և քայլիր․․․»,- հավելել է Փաշինյանը։

Նա նաև մեջբերել է Հակոբոս առաքյալի ընդհանրական թուղթը, ըստ որի՝ «ինչպես որ մեռած է մարմինը առանց հոգու, այնպես էլ մեռած է հավատը առանց գործերի», որտեղ գործը քայլելն ու ճանապարհից հետ չկանգնելն է։

«Հայաստանյայց Առաքելական Սուրբ Եկեղեցու դավանաբանության համաձայն՝ հուսահատությունը մեղք է... Հուսահատությունը մեղք է, և հետևաբար կարելի է վեր կենալ և քայլել միայն այդ մեղքի գայթակղությանը չտրվելով, որովհետև եթե հավատում ես Հիսուս Քրիստոսին, պետք է քայլես... Հավատալ Աստծուն նշանակում է չհուսահատվել»,-ասել է նա։