«Գները բարձրանում են, իսկ մարդկանց հնարավորությունները՝ ոչ»․ Վահան Բաբայան

Ռեֆորմիստների կուսակցության նախագահ Վահան Բաբայանի ֆեյսբուքյան գրառումը․ «Գները բարձրանում են, իսկ մարդկանց հնարավորությունները՝ ոչ։
Հայաստանում վերջին տարիներին քաղաքացիների համար գնաճը դարձել է առօրյա կյանքի ամենազգալի խնդիրներից մեկը։ Սննդամթերք, կենցաղային ապրանքներ, ծառայություններ, վարձավճարներ, հասարակական և մասնավոր տրանսպորտ․ շատ ընտանիքների համար նույն ապրանքների ու ծառայությունների դիմաց այսօր ավելի մեծ գումար է անհրաժեշտ։
Խնդիրը միայն այն չէ, որ առանձին ապրանքներ թանկանում են։ Խնդիրն այն է, որ եկամուտների և ծախսերի միջև հավասարակշռությունը խախտվում է։ Երբ աշխատավարձը չի աճում նույն տեմպով, ինչ առօրյա ծախսերը, ընտանիքի իրական գնողունակությունը նվազում է։
Հատկապես ծանր է այն ընտանիքների համար, որոնց բյուջեի մեծ մասը ծախսվում է սննդի, բնակարանի, կոմունալ վճարների և տրանսպորտի վրա։
Տնտեսական քաղաքականության արդյունավետությունը պետք է չափվի ոչ միայն մակրոտնտեսական ցուցանիշներով, այլ նաև մեկ պարզ հարցով՝ որքանո՞վ է քաղաքացին կարողանում արժանապատիվ ապրել իր եկամտով։
Մարդկանց պետք է ոչ թե թվերով «լավ» տնտեսություն, այլ այնպիսի տնտեսություն, որտեղ աշխատող մարդը կարող է իր աշխատավարձով ապահովել ընտանիքի բնականոն կյանքը»։