«Մեզ սպասվում է ոչ տաք և տեղումնառատ հոկտեմբեր»․ Գագիկ Սուրենյան

Հանրապետության գլխավոր հիդրոօդերևութաբան Գագիկ Սուրենյանը ֆեյսբուքյան իր էջում տեսանյութ է հրապարակել՝ «Առաջիկա օրերի և հոկտեմբեր ամսվա եղանակային պայմանների կանխատեսումը» գրառմամբ։

«Հոկտեմբերի 1-3-ին Հայաստանը կշարունակի գտնվել արևմուտքից ներթափանցած ցիկլոնի ազդեցության գոտում, ինչի արդյունքում, հատկապես հետկեսօրյա ժամերին և գիշերը, շրջանների մեծ մասում կդիտվեն ամպրոպային բնույթի կարճատև անձրևներ, առանձին հատվածներում դրանք կլինեն հորդառատ, հնարավոր է նաև կարկուտ։

Հոկտեմբերի 4-ին տեղումները ժամանակավորապես կդադարեն, օդի ջերմաստիճանը հոկտեմբերի 3-ի լույս 4-ի գիշերը Հայաստանի ողջ տարածքում կնվազի ևս 4-5 աստիճանով։
Հոկտեմբերին օդի ամսական միջին ջերմաստիճանը Հանրապետության ողջ տարածքում կանխատեսվում է կլիմայական նորմայի սահմաններում, տեղումների քանակը՝ նորմայից ավել, ինչը նշանակում է, որ մեզ սպասվում է ոչ տաք և տեղումնառատ հոկտեմբեր։

Տեղումնառատ հոկտեմբեր ասելով՝ պետք չէ հասկանալ, որ ամսվա բոլոր օրերին դիտվելու է անձրևը։ Բնականաբար կունենանք նաև արևառատ օրեր»,- տեսանյութում նշել է Սուրենյանը։