«Իրանը հարստացնում է ուրանը մինչև 60%` խաղաղ նպատակներով». Արաղչի

Իրանը խաղաղ նպատակներով հարստացնում է ուրանը մինչև 60%, և Թեհրանը չի խախտում Միջուկային զենքի չտարածման մասին պայմանագիրը (NPT): Այս մասին NBC News-ին տված հարցազրույցում հայտարարել է Իրանի արտաքին գործերի նախարար Աբաս Արաղչին։

«Մինչև 60% հարստացումն անօրինական չէ և մնում է Միջուկային զենքի չտարածման մասին պայմանագրի և մեր խաղաղ միջուկային ծրագրի շրջանակներում»,- ասել է նախարարը։

Արաղչիի խոսքով՝ Իրանն այս մակարդակով հարստացված ուրանն օգտագործում է բժշկական և այլ խաղաղ նպատակներով: Նա հավելել է, որ Թեհրանն առաջարկել է 2025 և 2026 թվականներին կնքել համաձայնագիր իր 60% հարստացված ուրանի պաշարների վերաբերյալ։

Արտգործնախարարը նաև հայտարարել է Իրանի պատրաստակամության մասին՝ շարունակել բանակցություններն իր միջուկային ծրագրի շուրջ, եթե կա «բարի կամք և խաղաղության իրական ցանկություն»: Նրա խոսքով՝ Թեհրանը ներկայում մտադիր է կենտրոնանալ վստահության ամրապնդման միջոցառումների վրա, այդ թվում՝ սառեցված իրանական ակտիվների ապաշրջափակման վրա։

Սեպտեմբերի 13-ին ԱՄՆ էներգետիկայի նախարար Քրիս Ռայթը հայտարարեց, որ Վաշինգթոնը պատրաստ է Իրանին մատակարարել միջուկային վառելիք, եթե Թեհրանը հրաժարվի ուրանի հարստացման իր ծրագրից: «Մենք կարող ենք [միջուկային] վառելիք [Իրանին] մատակարարել արտասահմանից», - ասել է Ռայթը։