«Կոչ ենք անում Վրաստանի պատրիարքարանին չկրկնել Հայ եկեղեցու մոտեցումները և չհետևել նրա օրինակին». Ադրբեջանի ԱԳՆ

Ադրբեջանի ԱԳՆ-ն հայտարարություն է տարածել՝ կապված Ադրբեջանի տարածքում գտնվող Կուրմուկի եկեղեցու վերաբերյալ Վրաց պատրիարքարանի արած հայտարարության հետ։

Ավելի վաղ Վրաց պատրիարքարանը հայտարարություն էր տարածել և նշել, որ պատմական Էրեթի Սուրբ Գևորգ մայր տաճարում և նրա տարածքում կատարվող աշխատանքները, մտահոգիչ են: «Չնայած այն հանգամանքին, որ Կուրմուկի մայր տաճարը գտնվում է Ադրբեջանի տարածքում, այն մեր երկրի և եկեղեցու պատմական և հոգևոր ժառանգության կարևորագույն հուշարձանն է»- նշված էր հայտարարության մեջ:

Ադրեջանի ԱԳՆ-ի հայտարարության մեջ նշվում է, թե Կուրմուկի եկեղեցու վերաբերյալ Վրաց պատրիարքարանի վերջին հայտարարությունը «հակասում է Ադրբեջանի և Վրաստանի միջև առկա բարեկամական, և բարիդրացիական հարաբերությունների ոգուն, ինչպես նաև անընդունելի է Ադրբեջանի տարածքում գտնվող աշխարհագրական և պատմական տեղանունները այլ անվանումներով ներկայացնելը»։

«Կրոնական կազմակերպությունները պետք է զերծ մնան դիրքորոշումներից, որոնք կարող են վնասել դարերի ընթացքում Ադրբեջանի և Վրաստանի ժողովուրդների միջև ձևավորված բարեկամության և բարիդրացիության պատմական հարաբերություններին։ Այս առումով մենք կոչ ենք անում Վրաստանի պատրիարքարանին չկրկնօրինակել Հայ եկեղեցու մոտեցումները կամ չհետևել նրա օրինակին»,- ասվում է հայտարարության մեջ: