Ըստ Դոնալդ Տուսկի` ուկրաինական բանակն ամեն ամիս տալիս է 27,000 զոհ և վիրավոր 

Լեհաստանի վարչապետ Դոնալդ Տուսկն հայտնել է, որ ուկրաինական բանակն ամեն ամիս կորցնում է 27,000 սպանված և վիրավոր զինվոր։ Նա ասել է, որ այս տեղեկատվությունը ստացել է ուկրաինացի քաղաքական գործիչներից։

«Մեր գործընկերներն Ուկրաինայում ինձ ասացին, որ վերջին մեկ ամսվա ընթացքում զոհերի թիվը հասել է 27,000-ի։ Եվ սրանք ռեկորդներ են բառի ամենատխուր իմաստով», - ասել է Տուսկը Լեհաստանի խորհրդարանի ստորին պալատում ունեցած ելույթի ժամանակ։

Gazeta.pl-ի փոխանցմամբ՝ սա առաջին դեպքն է, երբ ՆԱՏՕ-ի բարձրաստիճան պաշտոնյան պաշտոնապես հրապարակում է նման տեղեկատվություն։

Նախկինում Ուկրաինայի նախագահի աշխատակազմի ղեկավար Կիրիլո Բուդանովը հայտարարել էր, որ երկիրը պետք է ամսական մոբիլիզացնի առնվազն 30,000 զինվոր՝ «ունեցածը պահպանելու համար անհրաժեշտ նվազագույն թիվը» հավաքագրելու համար։

Սեպտեմբերի 10-ին ՆԱՏՕ-ի գլխավոր քարտուղար Մարկ Ռյութեն հայտարարել է, որ Ռուսաստանն ամեն ամիս Ուկրաինայի հետ պատերազմում կորցնում է ավելի քան 40,000 սպանված և վիրավոր զինվոր։ Ռյութեի խոսքով՝ սրանք ՆԱՏՕ-ի գնահատականներն են։

Ուկրաինայի նախագահ Վլադիմիր Զելենսկին պնդում էր, որ Ռուսաստանի ամսական կորուստները ռազմաճակատում կազմում են ավելի քան 30,000: 2026 թվականի մարտին նա այդ թիվը գնահատել էր 30,000-35,000:

Mediazona-ի և BBC-ի կամավորների և լրագրողների գնահատականների համաձայն՝ Ուկրաինայում լայնածավալ պատերազմի սկսվելուց ի վեր զոհվել է ռուսական կողմից կռվող առնվազն 248,800 զինծառայող: Իրական թվերը կարող են զգալիորեն ավելի բարձր լինել, քանի որ հաղորդված թիվը ներառում է միայն բաց աղբյուրներից ստացված տվյալներ: