«Արցախը եղել և մնում է հայրենասեր յուրաքանչյուր մարդու սրտում»․ «Ապրելու երկիր» կուսակցություն
48
Այսօր, 10:18
«Ապրելու երկիր» կուսակցությունը ֆեյսբուքյան էջում գրում է․ «Սիրելի՛ արցախցիներ, այսօր ձեր և մեր բոլորի կյանքի ամենաողբերգական օրվա տարելիցն է: 2023 թվականի սեպտեմբերի 19-ին ադրբեջանական ագրեսիայի հետևանքով տեղի ունեցած Արցախյան վերջին պատերազմին հաջորդեց ողբերգությունների մի ամբողջ շղթա՝ բենզինի պայթյունից զոհեր ու վիրավորներ, գերեվարված հայրենակիցներ և բռնագաղթի ճանապարհի չսպիացող վերքեր։ 9 ամիս կատարյալ շրջափակման մեջ հայտնված Արցախում տեղի ունեցածը հայերի էթնիկ զտում էր, և այն պետք է ստանա համապատասխան գնահատական միջազգային կառույցների կողմից։ Այդ ոճրագործությունը շարունակվում է նաև այսօր՝ Արցախում հայկական մշակութային և հոգևոր ժառանգության հետևողական ոչնչացմամբ և հայ գերիներին ապօրինաբար Բաքվի բանտերում պահելով ու նրանց խոշտանգումների ենթարկելով: Այս ամենի հետևանքները, անասելիորեն ցավալի, դուք շարունակում եք կրել ձեր ներսում և առօրյայում՝ հայտնվելով նորից ոտքի կանգնելու դժվարագույն ճանապարհին: Սիրելի՛ արցախցիներ, դուք մենակ չեք։ Մայր հայրենիքում հազարավոր ձեր հայրենակիցներ կանգնած են ձեր կողքին, կիսում են ձեր ցավը, հետամուտ են ձեր խնդիրների լուծմանը և պահանջատեր են ձեր իրավունքների վերականգնման հարցում։ Արցախցիները հերոսական ժողովուրդ են։ Նրանք մինչև վերջ պայքարել են իրենց պապերի հողում ապրելու, արարելու և սեփական հայրենիքում իրենց ճակատագիրը տնօրինելու իրավունքի համար։ Դա անժխտելի իրողություն է։ Իսկ Արցախը եղել և մնում է հայրենասեր յուրաքանչյուր մարդու սրտում՝ որպես ջերմ սիրո և խանդաղատանքի դրսևորում։ Արցախը մնացել է նաև բոլոր նրանց սրտերում, որոնց ներսում նրա անկմամբ ինչ-որ բան ավերվեց, և ինչ-որ բան ընդմիշտ մնաց կիսատ։ Մեր պարտքը մեծ է սերունդների առաջ... Հավե՛րժ փառք հայրենիքի համար իրենց կյանքը չխնայած հերոսներին։ Ազատությո՛ւն Բաքվի բանտերում գտնվող հայ գերիներին։ Ապրելու կամք, ուժ և իրենց բնորոշ տոկունություն՝ Արցախի ժողովրդին»։
