Կանադան գումար կհատկացնի Ուկրաինայի համար հրթիռներ ձեռք բերելու նպատակով

Կանադան 350 մլն կանադական դոլար կհատկացնի Ուկրաինայի համար հակաօդային պաշտպանության համակարգերի համար որսացող հրթիռների ձեռքբերման նպատակով։ Այս մասին հայտարարել է երկրի վարչապետ Մարկ Քարնին՝ Ուկրաինայի նախագահ Վլադիմիր Զելենսկու հետ համատեղ ասուլիսի ժամանակ։

«Այս փաթեթը կօգնի պաշտպանել Ուկրաինայի բնակիչներին, երկրի ենթակառուցվածքները և օդային տարածքը»,- հավելել է նա։

Կանադայի վարչապետն առանձին հայտարարել է նաև Ուկրաինայի էներգետիկ համակարգին աջակցության միջոցառումների մասին, որը ձմռանն ընդառաջ ենթարկվում է Ռուսաստանի հարձակումներին։ Մասնավորապես, Օտտավան Եվրոպական վերակառուցման և զարգացման բանկին (ԵՎԶԲ) կտրամադրի մոտ 435 մլն կանադական դոլարի (մոտ 271 մլն եվրո) նոր վարկային երաշխիքներ՝ էներգետիկ անվտանգությանն աջակցելու համար, այդ թվում՝ ձմռանը գազի ձեռքբերման և էլեկտրաէներգիայի դեֆիցիտի ժամանակ դրա արտադրության նպատակով։

Բացի այդ, Կանադան Ուկրաինայի վերականգնման համար կտրամադրի ընդհանուր 200 մլն կանադական դոլարի (մոտ 125 մլն եվրո) արտոնյալ վարկեր։