Մեծ Բրիտանիայում երկու օրում ավելի քան 1900 չվերթ է չեղարկվել

Մեծ Բրիտանիայի օդային երթևեկության կառավարման համակարգում տեղի ունեցած խափանումը երկու օրվա ընթացքում երկրում ավելի քան 1900 չվերթի չեղարկման է հանգեցրել։ Այս մասին հայտնում է The Guardian-ը՝ հղում կատարելով ավիացիոն տեղեկատվության վերլուծությամբ զբաղվող Cirium ընկերության տվյալներին։

Թեև տեխնիկական խնդիրը լուծվել է, չվերթների հետ կապված քաոսը շարունակվում է արդեն երկրորդ օրը։ Բացի այդ, մի շարք չվերթներ նաև ուշացել են, ինչն անհարմարություն է պատճառել տասնյակ հազարավոր ուղևորների։

Մեծ Բրիտանիայում օդային երթևեկության կառավարումն իրականացնող National Air Traffic Services (NATS) ընկերության ղեկավար Մարտին Ռոլֆը բացառել է կիբերհարձակման հավանականությունը։ Նրա խոսքով՝ տեղի ունեցածի առնչությամբ հետաքննություն կանցկացվի։