«2008-ից հետո Արևմուտքը պետք է հասկանար, որ Ռուսաստանի դեմ պատերազմել պետք չէ»․ Մեդվեդև

2008 թվականին Հարավային Օսիայում տեղի ունեցած իրադարձություններից հետո գլխավոր դասը, որը Արևմուտքը պետք է քաղեր, այն է, որ Ռուսաստանի դեմ պատերազմել պետք չէ, հայտարարել է ՌԴ Անվտանգության խորհրդի փոխնախագահ Դմիտրի Մեդվեդևը։

Նա նշել է, որ Ռուսաստանի հետ պատերազմ սանձազերծելու նման փորձերի արդյունքը ամեն անգամ եղել է ռուսական ոգու և զենքի ուժի հաղթանակը։

«Անիմաստ է նաև ազգային հարցը հրահրելը։ Դա միշտ ցավալի, իսկ հաճախ նաև անդառնալի հետևանքների է հանգեցնում հենց իրենց՝ սադրիչների համար։ Հոգեպես անհավասարակշիռ (Վրաստանի նախկին նախագահ Միխայիլ — խմբ.) Սաակաշվիլին դա չհասկացավ։ Իսկ որտե՞ղ է նա հիմա, ի՞նչ է պատահել նրա հետ»,- հավելել է Մեդվեդևը։

Նշենք, որ 2008 թվականի օգոստոսի 7-ի լույս 8-ի գիշերը վրաց-օսական հակամարտությունը նոր թափով բռնկվեց։ Վրաստանի զինված ուժերը սկսեցին գնդակոծել Ցխինվալին, այնուհետև փորձեցին գրոհով գրավել քաղաքը։ Օգոստոսի 8-ի ցերեկը Ռուսաստանի նախագահ Դմիտրի Մեդվեդևը հայտարարեց հակամարտության գոտի զորքեր մտցնելու գործողության մեկնարկի մասին։ Սկսվեց հնգօրյա պատերազմ։ Օգոստոսի 26-ին Ռուսաստանը պաշտոնապես ճանաչեց Հարավային Օսիան և Աբխազիան՝ որպես անկախ պետություններ։