«Մեքքայի համաձայնագիրն ուղղված չէ որևէ երկրի դեմ»․ Էրդողան

Թուրքիայի, Սաուդյան Արաբիայի և Պակիստանի ստորագրած պաշտպանության համաձայնագիրը երեք երկրների ռազմավարական կամքի դրսևորումն է և ուղղված չէ որևէ պետության դեմ։ Այս մասին Թուրքիայի նախագահ Ռեջեփ Թայիփ Էրդողանն ասել է Asharq Al-Awsat թերթին տված հարցազրույցում։

«Համաձայնագիրը, որը հիմնված է այն ըմբռնման վրա, որ տարածաշրջանի խնդիրները պետք է լուծեն հենց տարածաշրջանի երկրները, ռազմավարական կամքի դրսևորում է՝ հիմնված խաղաղության, կայունության, համերաշխության և հավաքական զսպման վրա, այլ ոչ թե որևէ առանձին երկրի դեմ ուղղված դաշինքի ձևավորման։ Թուրքիայի, Սաուդյան Արաբիայի և Պակիստանի ձեռնարկած այս պատմական քայլը արտահայտում է այն ըմբռնումը, որ մեկի անվտանգությունը բոլորի անվտանգությունն է»,- Էրդողանի խոսքերը մեջբերում է Թուրքիայի նախագահի աշխատակազմի հաղորդակցության վարչությունը։

Թուրքիայի առաջնորդը նշել է, որ համաձայնագիրը բաց է «բոլոր եղբայրական երկրների» համար։ Նրա կարծիքով՝ տարածաշրջանի ապագան այլևս չի կարող ձևավորվել առանց տարածաշրջանի երկրների կամքը հաշվի առնելու և «դրսից պարտադրված բաղադրատոմսերի» հիման վրա։