«Պետք է լուրջ վերաբերվել ռազմական օբյեկտների վրայով թռչող ՉԹՕ-ների մասին տեղեկություններին»․ Ռուբիո

ԱՄՆ-ն պետք է լուրջ վերաբերվի ռազմական օբյեկտների վրա նկատված չբացահայտված թռչող օբյեկտների (ՉԹՕ) մասին տեղեկություններին։ Այս մասին հայտարարել է ԱՄՆ-ի պետքարտուղար Մարկո Ռուբիոն՝ Սպիտակ տան աշխատակազմի ղեկավարի տեղակալ Սթիվեն Միլլերի կնոջ՝ Քեյթի Միլլերի փոդքասթում։

«Մեր ռազմական օբյեկտների վրայով ինչ-որ բաներ են թռչում, սակայն դրանք մեզ չեն պատկանում։ Մենք պետք է պարզենք, թե ինչ է դա, և լուրջ վերաբերվենք դրան»,— ասել է Ռուբիոն։

Նրա խոսքով՝ ինքը չգիտի՝ «ով է դա և ինչ է դա»։ Ռուբիոն նշել է, որ ԱՄՆ-ի Սենատում աշխատելու տարիներին բարձրացրել է ՉԹՕ-ների հարցը։ Նա հավելել է, որ այս թեմային չի վերաբերվում՝ որպես դավադրության տեսության։

«Մարդիկ կարծում են, որ մենք ինչ-որ բան ենք թաքցնում։ Ես ձեզ վստահեցնում եմ, որ եթե այս վարչակազմը որևէ բան իմանար [այլմոլորակայինների մասին], նախագահը կլիներ ամենուրեք՝ հեռուստատեսային ելույթներ կունենար, լուսանկարներ, տեսանյութեր կցուցադրեր», - նշել է պետքարտուղարը։