«Կանխվել է 16 մլն ռուբլու ապօրինի արտահանումը Հայաստան»․ ՌԴ մաքսային ծառայություն

Միներալնիե Վոդիի օդանավակայանի մաքսային աշխատակիցները կանխել են 16 միլիոն ռուբլու անօրինական արտահանումը Հայաստան։ Այս մասին հայտնում է Ռուսաստանի Դաշնային մաքսային ծառայության (ԴՄԾ) մամուլի ծառայությունը։ Դրամական միջոցները փորձել է տեղափոխել Ռուսաստանի 29-ամյա քաղաքացի։

Նրա ձեռքի ուղեբեռում հայտնաբերել են պոլիէթիլենային 5 տոպրակ՝ մոտ 16 մլն ռուբլի (220 հազար դոլար) ընդհանուր արժողությամբ թղթադրամներով։ Ընդ որում, քաղաքացին պարզաբանել է, որ այդ գումարը նախատեսված էր Հայաստանում մեքենաներ գնելու համար։ «Հետագա վաճառքի համար մեքենաները նա ընտրել է առցանց ծառայության միջոցով, իսկ հետագա առաքումը Ռուսաստան ծրագրել է կազմակերպել եղբոր հետ համատեղ։ Քաղաքացին նաև հայտարարել է, որ տեղյակ չի եղել Ռուսաստանից ԵԱՏՄ երկրներ կանխիկ դրամի արտահանման սահմանափակումների մասին»,- հայտնել են գերատեսչությունից։