Սև ծովում թուրքական նավն ԱԹՍ-ների հարձակմանն է ենթարկվել

Կամերունի դրոշի ներքո նավարկող «Նադեժդա» նավը, որը թուրքական Սամսուն նավահանգստից Նովոռոսիյսկ էր տեղափոխում մրգեր և բանջարեղեն, Սև ծովում ենթարկվել է անօդաչու թռչող սարքերի հարձակման, որի հետևանքով վիրավորվել են չորս նավաստիներ, այդ թվում՝ երեք թուրք, հաղորդում է «Ջումհուրիեթ»-ը։

Հրապարակման համաձայն՝ նավը հարձակման է ենթարկվել տեղական ժամանակով ժամը 16:30-ի սահմաններում (Երևանի ժամանակով ժամը 17:30-ին՝ Նովոռոսիյսկից մոտավորապես 30 մղոն հեռավորության վրա։

Նավի կապիտան Յալչին Սահինը հայտարարել է, որ «հարձակումն իրականացրել է Ուկրաինան, և օգտագործվել է 6-7 անօդաչու թռչող սարք»։ Սահինն ասել է, որ իրենք օգնության են սպասում, և որ բոլորն անվտանգ են, սակայն կան վիրավորներ։ Նավի վրա հրդեհ է բռնկվել։

Ըստ բաց լրատվամիջոցների հաղորդագրությունների՝ նավը պատկանում է «Նադեժդա Ռորո Ինկ.»-ին, իսկ դրա շահագործման և տեխնիկական ղեկավարը թուրքական «Քալյոնջու Ռո Ռո Դենիզչիլիկ» ընկերությունն է։