Վաշինգթոն նահանգում անտառային հրդեհների պատճառով 60 հազար մարդ է տարհանվել

ԱՄՆ Վաշինգթոն նահանգի արևելյան հատվածում՝ Սպոքան քաղաքի շրջանում անտառային հրդեհներ են մոլեգնում, գրում են CNN-ն ու Associated Press (AP)-ը։ Տեղական իշխանությունները հայտնել են, որ հրդեհը ոչնչացրել է ավելի քան 600 տուն և այլ շինություններ։ Մոտ 60 հազար մարդ տարհանվել է։ Տուժածների մասին տեղեկություններ չկան։

AP-ի հաղորդմամբ՝ անցած հանգստյան օրերին Սպոքանի շրջանում այրվել է մոտ 21 քառ. կմ անտառային տարածք և այլ հողատարածքներ։ Ընդհանուր առմամբ, վերջին շրջանում նահանգում այրվել է ավելի քան 1 հազար քառ. կմ տարածք։ Որոշ հրդեհների, այդ թվում՝ Սպոքանի շրջակայքում բռնկվածների տարածումը մինչ այժմ չի հաջողվել սահմանափակել։

AP-ն գրում է, որ խոշոր հրդեհները շարունակվում են նաև ԱՄՆ-ի արևմուտքի այլ նահանգներում, մասնավորապես՝ Այդահոյում, Յուտայում և Օրեգոնում։ Այսպես, արդեն շուրջ տասը օր շարունակվում է արևմտյան Այդահոյում և արևելյան Օրեգոնում գտնվող մարգագետիններում ու արոտավայրերում բռնկված հրդեհը։ Այնտեղ այրվել է մոտ 1,36 հազար քառ. կմ տարածք։