«Զախարովայի հայտարարությունները իրականության խեղաթյուրում են»․ Հաջիզադե

ՌԴ ԱԳՆ պաշտոնական ներկայացուցիչ Մարիա Զախարովայի հերթական հայտարարությունները հայ-ադրբեջանական նախկին հակամարտության վերաբերյալ խեղաթյուրում են իրականությունը։

Ադրբեջանական լրատվամիջոցների հաղորդմամբ՝ այս մասին հայտարարել է Ադրբեջանի ԱԳՆ խոսնակ Այխան Հաջիզադեն՝ մեկնաբանելով Զախարովայի խոսքերը։ Հաջիզադեի մեկնաբանմամբ՝ Լեռնային Ղարաբաղը «միջազգային հանրության, այդ թվում՝ Ռուսաստանի Դաշնության կողմից, մշտապես ճանաչվել է որպես Ադրբեջանի անբաժանելի մաս»։

«Այդ պատճառով Ադրբեջանի ինքնիշխան տարածքների նկատմամբ ՀԱՊԿ մեխանիզմների կիրառման հարցը մշտապես օրակարգում պահելու փորձը, ինչպես նաև այն Հայաստանի կողմից Ղարաբաղի ճանաչման կամ չճանաչման հետ կապելը, ոչ միայն հակասում է Ադրբեջանի՝ Ղարաբաղի վերաբերյալ ռուսական կողմի պաշտոնական դիրքորոշմանը, այլև բացարձակապես անհիմն է»,- ասել է Հաջիզադեն։

ԱԳՆ ներկայացուցիչը հավելել է, որ «Ադրբեջանը միջազգային իրավունքի պահանջներին համապատասխան վերականգնել է իր տարածքային ամբողջականությունն ու ինքնիշխանությունը, և այդպիսով նախկին հակամարտությունը կարգավորվել է»։