Իրանը հարվածել է Քուվեյթում ԱՄՆ երեք բազաներին

Իրանի բանակը հարվածներ է հասցրել Քուվեյթում տեղակայված ԱՄՆ-ի երեք ռազմաբազաների օբյեկտներին և ուղղաթիռների կայանատեղիին, հայտնում է Press TV-ն։

«Իրանի բանակը հայտարարել է, որ իր հարվածային կամիկաձե անօդաչու թռչող սարքերը հարձակվել են Քուվեյթում գտնվող «Արիֆջան» ռազմաբազայի վարչական շենքերի և ռադիոուղղորդման ալեհավաքների, «Ալ-Ուդայրի» ճամբարի ուղղաթիռների կայանատեղիի, ինչպես նաև «Ահմադ Ալ-Ջաբեր» ավիաբազայի զորանոցի վրա»,- ասվում է Press TV-ի թելեգրամյան ալիքում հրապարակված հաղորդագրության մեջ։

ԱՄՆ-ն նույնպես հարվածներ է հասցրել Իրանին։ ԱՄՆ ԶՈՒ կենտրոնական հրամանատարության հաղորդմամբ՝ ամերիկյան ուժերը հարվածներ են հասցրել Իրանի ռազմական հրամանատարական կենտրոններին, հրթիռների և անօդաչու թռչող սարքերի արձակման հարթակներին, ինչպես նաև հակաօդային պաշտպանության համակարգերին։