Իրանի հարավում ԱՄՆ-ի հարվածների հետևանքով զոհվել է առնվազն 30 խաղաղ բնակիչ

Վերջին օրերին Իրանի հարավում ԱՄՆ-ի կողմից իրականացված օդային հարվածների հետևանքով զոհվել է առնվազն 30 խաղաղ բնակիչ, հայտնել է Իսլամական Հանրապետության կառավարության պաշտոնական ներկայացուցիչ Ֆաթեմեհ Մոհաջերանին։

Al Jazeera-ի հաղորդմամբ՝ Իրանի առողջապահության նախարարության պաշտոնական ներկայացուցիչ Հոսեյն Քերմանփուրը հայտնել է, որ ամերիկյան վերջին հարվածների հետևանքով տուժել է ավելի քան 260 մարդ։

Հիշեցնենք՝ ավելի վաղ ԱՄՆ Կենտրոնական հրամանատարությունը (CENTCOM) հայտնել էր Հորմուզի նեղուցի մերձակայքում և Իրանի առափնյա շրջաններում գտնվող տասնյակ օբյեկտներին հարվածներ հասցնելու մասին։ Հայտարարության մեջ նշվում է, որ 7 ժամվա ընթացքում ԱՄՆ զինված ուժերը հարվածներ են հասցրել իրանական հրթիռային օբյեկտներին և անօդաչու թռչող սարքերի բազաներին, ռազմածովային ուժերին և առափնյա պաշտպանության համակարգերին։