«Սա կոտորած է, և այն պետք է դադարեցվի». Թրամփը` Ուկրաինայում պատերազմի մասին

ԱՄՆ-ի նախագահ Դոնալդ Թրամփն ասել է, որ իր համար դժվար է նայել Ուկրաինայում մարտական ​​գործողությունների լուսանկարներին, որոնք իրեն ցույց են տալիս վարչակազմի պաշտոնյաները: Թրամփի հայտարարությունը հնչել է Թուրքիայի նախագահ Ռեջեփ Թայիփ Էրդողանի հետ համատեղ ճեպազրույցի ժամանակ:

«Ամսական 30,000 մարդ՝ նրանք մահացած են: Նրանք իրենց ծնողներին թողնում են Ուկրաինայում, Ռուսաստանում, իսկ մեկ շաբաթ անց՝ մահացած: Սա խելագարություն է: Սա մեզ չի վերաբերում, սա շատ հեռու է, բայց վերաբերում է Եվրոպային: Մեր միջև օվկիանոս կա: Ես պարզապես չեմ կարողանում հանդուրժել այն, ինչ կատարվում է: Ես տեսել եմ լուսանկարներ ռազմաճակատից... Սա անօդաչուների պատերազմ է, սա անօդաչուների պատերազմ է: Սա բոլորովին նոր տեխնոլոգիա է... Բայց ես ուզում եմ ասել. «Մի՛ ուղարկիր ինձ դրանք (լուսանկարները)»: Փիթը (Հեգսեթ, պաշտպանության նախարար) դրանք ուղարկում է ինձ, և ես ասում եմ. «Փիթ, գիտես, սա չի օգնում»: Ես երբեք նման բան չեմ տեսել: Սա կոտորած է, և այն պետք է դադարեցվի», - ասել է Թրամփը։

Ավելին, ամերիկացի առաջնորդը հայտարարել է, որ թե՛ Ուկրաինայի նախագահ Վլադիմիր Զելենսկին, թե՛ Ռուսաստանի նախագահ Վլադիմիր Պուտինը հանձնառու են համաձայնության հասնելուն։ Նա նաև ասել է, որ շատ լավ զրույցներ է ունեցել թե՛ Զելենսկու, թե՛ Պուտինի հետ։

Թրամփի և Զելենսկու հանդիպումը նախատեսված է հուլիսի 8-ին՝ ՆԱՏՕ-ի գագաթնաժողովի շրջանակներում։