Թրամփի փեսայի հետ կապված նորակառույցի շինարարությունը Տիրանայում դարձել է բախումների պատճառ

Ալբանիայի մայրաքաղաք Տիրանայում հինգշաբթի օրը տեղի են ունեցել բախումներ ոստիկանության և կառավարության դեմ բողոքի ակցիայի մասնակիցների միջև։ ԱՄՆ-ի նախագահ Դոնալդ Թրամփի փեսա Ջարեդ Քուշների հետ կապված էլիտար նորակառույցի կառուցման դեմ բողոքի ցույցերի ժամանակ բռնություններ են տեղի ունեցել, հաղորդում է Associated Press-ը։
Ոստիկանության տվյալներով՝ իրավապահ մարմինները արցունքաբեր գազ և պղպեղի ցողաշիթ են օգտագործել, երբ բողոքի ակցիայի մասնակիցներն սկսել են քարեր, ձվեր և այլ առարկաներ նետել նրանց վրա։ Անկարգությունների հետևանքով ձերբակալվել է տասնութ մարդ, իսկ 12 ոստիկան վիրավորվել է։

Բողոքի ակցիան «Ֆլամինգոյի հեղափոխություն» անվամբ ամենօրյա բողոքի ակցիաների մի մասն էր և տևել է ավելի քան մեկ ամիս։ Դրանք սկսվել են ափին շքեղ հանգստավայրային համալիր կառուցելու ծրագրերի պատճառով, որը, ըստ քննադատների, կխախտի էկոլոգիապես զգայուն տարածքը։

Սկզբում բողոքի ակցիաները կենտրոնացած էին զարգացման նախագծի շուրջ բնապահպանական մտահոգությունների վրա, սակայն հետագայում դրանք ընդլայնվեցին և ստացան ավելի լայն քաղաքական երանգ, այդ թվում՝ պահանջելով կառավարության և Ալբանիայի վարչապետ Էդի Ռամայի հրաժարականը։

Վերջին շաբաթներին հազարավոր մարդիկ դուրս են եկել փողոցներ՝ սուլիչներով և պաստառներներով, որոնց վրա պատկերված էին ֆլամինգոներ՝ պահպանվող չվող թռչուններ, որոնց բնակավայրը վտանգված է Ադրիատիկ ծովի ափին գտնվող Նարտա լագուն տարածքում։

Ալբանիայի կառավարությունը պնդում է, որ զարգացման նախագիծը կարող է խթանել բարձրակարգ զբոսաշրջությունը և արագացնել երկրի ինտեգրումը Եվրոմիությանը: Այնուամենայնիվ, նախաձեռնությունը, որը ենթադրում է լքված կղզու և հարակից ափամերձ գծի վերականգնում, քննադատության է արժանացել բնապահպանների և կառավարության հակառակորդների կողմից։

Տիրանայում խորհրդարանի շենքի մոտ տեղի ունեցած հանրահավաքի ժամանակ որոշ ցուցարարներ քարեր, ձվեր և պլաստիկե շշեր են նետել ոստիկանության վրա և վնասել ոստիկանական մեքենան՝ մետաղական առարկաներով կոտրելով դրա ապակիները: Ոստիկանությունը գազ, պղպեղի ցողաշիթ և ջրցան է օգտագործել ամբոխը ցրելու համար: Ներքին գործերի նախարար Բեսֆորտ Լամալարին դատապարտել է բռնությունը՝ ասելով, որ ոստիկանների վրա հարձակումները հարձակում են պետության և հասարակական կարգի վրա: