«Հայաստանը մինչ օրս չի պատասխանել անհայտ կորածների վերաբերյալ փոխանցված ցուցակներին»․ Ջեյհուն Ռզաև

Ադրբեջանը հայկական կողմին տրամադրել է Ղարաբաղյան առաջին պատերազմի ժամանակ անհայտ կորած քաղաքացիների ցուցակներ և տեղեկություններ, սակայն մինչ օրս պատասխան չի ստացել։ Ինչպես հաղորդում է АПА-ն, այս մասին ասել է Ադրբեջանի գերիների, պատանդների և անհայտ կորածների հարցերով ​​հանձնաժողովի անդամ Ջեյհուն Ռզաևը: Նրա խոսքով՝ 2025 թվականի փետրվարի 7-ին տեղի է ունեցել առաջին հանդիպումը Ադրբեջանի պետական ​​հանձնաժողովի ներկայացուցիչների և Հայաստանի գերիների, պատանդների և անհայտ կորած անձանց հարցերով միջգերատեսչական հանձնաժողովի ներկայացուցիչների միջև։ «Ադրբեջանական կողմը մյուս կողմին տրամադրել է համապատասխան տեղեկատվություն Ղարաբաղյան առաջին պատերազմի ժամանակ անհայտ կորած Ադրբեջանի քաղաքացիների վերաբերյալ: Միաժամանակ, հայկական ծագումով անհայտ կորած անձանց ճակատագրի պարզաբանումը հեշտացնելու համար, Ադրբեջանը առաջարկել է փոխանցել նրանց ընտանիքի անդամների ԴՆԹ-ի պրոֆիլները: Հետագայում մյուս կողմի հետ կապերը շարունակվել են առցանց և հեռախոսային եղանակով: Թեև հակառակ կողմը հայտարարել է, որ կուսումնասիրի ներկայացված նյութերը և ադրբեջանական կողմին կտրամադրի համապատասխան տեղեկատվություն, մինչ օրս որևէ տվյալ չի ներկայացվել»,- նշել է նա։