«Իսրայելը մնում է ԱՄՆ-ի և Իրանի հաշտեցման ճանապարհին ամենամեծ խոչընդոտը»․ Թուրքիայի ՊՆ

Իսրայելը մնում է ԱՄՆ-ի և Իրանի հաշտեցման ճանապարհին ամենամեծ խոչընդոտը։ Այս մասին լրագրողներին հայտնել են Թուրքիայի պաշտպանության նախարարությունում։

«Մենք ողջունում ենք ԱՄՆ-ի և Իրանի միջև ձեռք բերված համաձայնությունը և հույս ենք հայտնում, որ այն կշարունակի գործել, իսկ բոլոր շահագրգիռ կողմերը ընթացիկ տեխնիկական բանակցությունների ընթացքում կդրսևորեն զգուշավոր և պատասխանատու մոտեցում։ Մյուս կողմից՝ Իսրայելը, որը հայտարարել է Հարավային Լիբանանի օկուպացիան շարունակելու մտադրության մասին՝ չնայած ստորագրված համաձայնությանը, և պահպանում է ագրեսիվ դիրքորոշում այդ տարածաշրջանում, մնում է հաշտեցման ճանապարհին ամենալուրջ խոչընդոտը»,– նշել են նախարարությունից։

Պաշտպանության նախարարությունը կարծում է, որ «[ԱՄՆ-Իրան բանակցությունների] գործընթացը խաթարելու փորձերը կանխելու համար միջազգային հանրությունը պետք է ավելի վճռական դիրքորոշում ընդունի Իսրայելի քաղաքականության նկատմամբ և կոնկրետ քայլեր ձեռնարկի»։