ԱՄՆ Քոնգրեսի հանձնաժողովը կքվեարկի հայ գերիներին ազատ արձակելու կոչով փոփոխության նախագծի շուրջ

Ամերիկայի Հայ Դատի Հանձնախումբը (ANCA) ողջունում է Ներկայացուցիչների պալատի Արտաքին հարաբերությունների հանձնաժողովի երկկուսակցական գործողությունը՝ առաջ մղելու Ներկայացուցիչների պալատի դիվանագիտական ծառայության մասին օրենքում (H.R. 9086) փոփոխությունը, որը կոչ է անում Ադրբեջանին անհապաղ և անվերապահորեն ազատ արձակել բոլոր հայ ռազմագերիներին և քաղբանտարկյալներին։ Այս մասին հայտնում է Ամերիկայի Հայ դատի հանձնախումբը։ Փոփոխությունը, որը նախաձեռնվել է Քոնգրեսի հայկական հանձնախմբի փոխնախագահ Բրեդ Շերմանի կողմից, հանձնաժողովի քննարկման փուլն անցել է՝ ստանալով Ներկայացուցիչների պալատի Արտաքին հարաբերությունների հանձնաժողովի նախագահ Բրայան Մասթի աջակցությունը և այժմ սպասվում է, որ այն կուղարկվի հանձնաժողովի անվանական քվեարկության։

Շերմանը նշել է, որ պատանդների ազատ արձակումն ուղղակիորեն կապված է նախագահ Դոնալդ Թրամփի՝ Հարավային Կովկասում խաղաղության հաստատման ջանքերի հետ։ «Քանի դեռ նախագահ Թրամփը շարունակում է իր ջանքերը՝ Հարավային Կովկասում տևական խաղաղություն ապահովելու ուղղությամբ, հայ ռազմագերիների և քաղբանտարկյալների ազատ արձակումը նշանակալի քայլ կլինի այդ նպատակին հասնելու ճանապարհին»,- ասել է Շերմանը։