«Ալիևի հաղթանակն ու Բաքվի ակնկալիքները. Երևանն այլևս նահանջելու տեղ չունի»․ ադրբեջանական ԶԼՄ

«Հայաստանում խորհրդարանական ընտրությունները դարձել են ոչ միայն այդ երկրի ներքին գործը, այլև տարածաշրջանային փոփոխությունների կարևոր ցուցիչ։ Դրանց արդյունքներն իրավամբ կարելի է անվանել Ադրբեջանի նախագահ Իլհամ Ալիևի ռազմավարական հաղթանակ։ Քարոզարշավի հիմնական գործոնը Ադրբեջանի առաջնորդի անհատականությունն էր, նրա հետևողական տարածաշրջանային քաղաքականությունը և դրան առնչվող խաղաղության օրակարգը Հայաստանի հետ հարաբերություններում, գրում է ադրբեջանական «Minval»-ը։

Եթե ​​Բաքվի կողմից տարածքային ամբողջականությունը վերականգնելու վճռական ռազմական, քաղաքական և դիվանագիտական ​​քայլեր չլինեին, քիչ հավանական է, որ հայկական քաղաքական վերնախավը առաջնահերթություն կտար խաղաղության և սահմանների ճանաչման սկզբունքին։ Հենց Ադրբեջանի հաջող քաղաքականությունն էր, որը ցույց տվեց նոր իրողությունների անշրջելիությունը, որն, ի վերջո, որոշեց ընտրությունների արդյունքը։ Հայ ժողովուրդը գործնական եզրակացություններ է անում վերջին տարիների իրադարձություններից և գիտակցում է Ադրբեջանի հետ միջազգային իրավունքի հիման վրա հարաբերությունների կարգավորման անխուսափելիությունը։

«Հիմա, երբ ընտրություններն ավարտվել են, եկել է կոնկրետ գործողությունների ժամանակը։ Ադրբեջանը հստակ ձևակերպում է իր ակնկալիքները Հայաստանում նոր քաղաքական շրջափուլից։ Նախ՝ Հայաստանի տարածքում «Ղարաբաղյան անջատողականության» հետ կապված բոլոր կառույցները, մնացորդներն ու տարրերը պետք է ամբողջությամբ վերացվեն։ Սա վերաբերում է ինչպես ֆորմալ, այնպես էլ ոչ ֆորմալ ինստիտուտներին, որոնք շարունակում են աջակցել «ռևանշիստական» օրակարգին։

Երկրորդ, Հայաստանը պարտավոր է ապահովել այսպես կոչված «Ղարաբաղյան ներկայացուցչությունների» և այլ «անջատողական» կառույցների փակումը ՌԴ-ում, Ֆրանսիայում, ԱՄՆ-ում և այլ երկրներում: Նման կազմակերպություններին աջակցելը անհամատեղելի է նրա հռչակած խաղաղության քաղաքականության հետ:

Երրորդ՝ ամենակարճ ժամկետում անհրաժեշտ է անցկացնել հանրաքվե և ընդունել Հայաստանի Հանրապետության նոր Սահմանադրություն, որում պաշտոնապես կարձանագրվի Ադրբեջանի նկատմամբ ցանկացած տարածքային պահանջից հրաժարում: Դա կդառնա առանցքային իրավական քայլ, որը կվերացնի հիմնարար հակասությունները։ Ողջ գործընթացի տրամաբանական ավարտը պետք է լինի Ադրբեջանի և Հայաստանի միջև լիարժեք խաղաղության պայմանագրի ստորագրումը։ Նման փաստաթուղթը կարձանագրի նոր իրողությունները, կապահովի երկարաժամկետ կայունություն տարածաշրջանում և ճանապարհ կբացի տնտեսական համագործակցության և տարածաշրջանային զարգացման համար:

Ադրբեջանը Իլհամ Ալիևի կոշտ և վստահ ղեկավարության ներքո անզիջում թելադրում է տարածաշրջանի օրակարգը՝ հենվելով իրավունքի ուժի, այլ ոչ թե ուժի իրավունքի վրա: Հիմա Երևանն այլևս նահանջելու տեղ չունի։ «Ղարաբաղյան օրակարգի» մնացորդների պահպանման ցանկացած փորձ կդիտարկվի՝ որպես ուղիղ մարտահրավեր և կստանա համապատասխան արձագանք։ Ստանձնած պարտավորությունները կատարելու Հայաստանի իրական, այլ ոչ թե հռչակագրային պատրաստակամությունից է կախված ոչ միայն երկկողմ հարաբերությունների ապագան, այլև բուն կայունությունը Հարավային Կովկասում», - գրում է լրատվամիջոցը: