«Թուրքիան առաջընթաց է արձանագրում ԱՄՆ-ի և Իրանի միջև բանակցություններում»․ Ֆիդան

Անկարան արձանագրում է ԱՄՆ-ի և Իրանի միջև բանակցային գործընթացում նկատվող առաջընթացը, և ակնկալում է կոնկրետ արդյունքներ։ Այս մասին հայտարարել է Թուրքիայի արտաքին գործերի նախարար Հաքան Ֆիդանը։

«Իրան-ԱՄՆ պատերազմը բացասաբար է անդրադառնում ոչ միայն մեր տարածաշրջանի, այլև ամբողջ աշխարհի վրա։ Մենք գոհունակությամբ արձանագրում ենք Իրանի և ԱՄՆ-ի միջև բանակցություններում առաջընթացը և հույս ունենք, որ այդ բանակցությունները կհանգեցնեն կոնկրետ արդյունքների և կնպաստեն երկարատև խաղաղության և կայունության հաստատմանը։ Հորմուզի նեղուցում նավագնացության ազատության վերականգնումը և պատերազմից առաջ գոյություն ունեցող իրավիճակին վերադառնալը անհրաժեշտություն է համաշխարհային տնտեսության, էներգետիկայի և անվտանգության տեսանկյունից»,- ասել է նա։

Միևնույն ժամանակ, Ֆիդանի խոսքով՝ «չնայած բանակցություններում նկատվող առաջընթացին, Անկարայում խոր մտահոգությամբ են արձանագրում զինադադարի պարբերական խախտումները»։ «Կողմերը պետք է խուսափեն այնպիսի քայլերից, որոնք կարող են վտանգել դիվանագիտական գործընթացը։ Միջազգային հանրությունը պետք է միասնական կամք ցուցաբերի՝ պատերազմի դադարեցման համար։ Հատկապես կարևոր է կանխել Իսրայելի կողմից զինադադարը խափանելու փորձերը»,- հավելել է նա։