«Ռուսաստանը հայկական գյուղատնտեսական արտադրանքը կփոխարինի ադրբեջանականով». Բորիս Տիտով

Ռուսաստանը կարող է ներմուծվող հայկական գյուղատնտեսական արտադրանքի մի մասը փոխարինել Ադրբեջանից մատակարարվող ապրանքներով։ Այդ մասին հայտարարել է Ռուսաստանի նախագահի հատուկ ներկայացուցիչ Բորիս Տիտովը։

«Ռուսաստանը հայկական գյուղատնտեսական արտադրանքը կփոխարինի ադրբեջանականով։ Ադրբեջանը ի վիճակի է ռուսական շուկային առաջարկել զգալիորեն ավելի շատ գյուղատնտեսական արտադրանք, քան Հայաստանը»,- ասել է Տիտովը «Սպուտնիկ Ադրբեջան» գործակալությանը տված հարցազրույցում։

Նրա խոսքով՝ Ադրբեջանի գյուղատնտեսական ոլորտն ունի անհրաժեշտ ներուժ՝ ռուսական շուկա արտահանումը մեծացնելու համար։ Սա ենթադրում է արտահանման ծավալների մեծացման և թափուր տեղերը լրացնելու հնարավորություն՝ ընդլայնելով արտադրությունն ու լոգիստիկ հնարավորությունները։

Կրեմլը նախկինում նշել էր, որ Հայաստանը չի արձագանքել Ռուսաստանի կողմից լոլիկի ներմուծումը սահմանափակելու որոշմանը։ Ռուսաստանի կարգավորող մարմինները սահմանափակող միջոցներ են կիրառել մի շարք բանջարեղենային արտադրանքի նկատմամբ։ Գրում է rosbalt.ru-ն։

«Ռոսսելխոզնադզորը» նշել է, որ Հայաստանից ստացված որոշ գյուղատնտեսական արտադրանքներ չեն համապատասխանում ներկայիս պահանջներին։ Այն նաև կարծիք է հայտնել, որ հանրապետության համապատասխան մարմինները լիովին չեն կարգավորում ոլորտը՝ գյուղատնտեսության կառավարման կառուցվածքի փոփոխություններից հետո։