«Լարսում կանգնած է ոչ թե բեռնատարը, այլ Հայաստանի տնտեսությունը»․ Էդմոն Մարուքյան

ԼՀԿ ղեկավար Էդմոն Մարուքյանը ֆեյսբուքյան իր էջում տեսանյութ է հրապարակել՝ «Լարսում կանգնած է ոչ թե բեռնատարը, այլ Հայաստանի տնտեսությունը. արտահանողները մնացել են մենակ» գրառմամբ։ Անդրադառնալով Ռուսաստանի կողմից հայկական որոշ ապրանքների ներմուծման սահմանափակումներին, մասնավորապես ասում է․ «Իշխանություններն ասում են՝ 20 օր է, կդիմանանք և ամեն ինչ կկարգավորվի, այսինքն նրանք նկատի ունեն, որ 20 օրից իրենք կվերընտրվեն ու հարցը կկարգավորվի։ Հիմա հարց. եթե ՌԴ-ն ձեր վարած քաղաքականության հետևանքով պրոբլեմ ունի ձեզ հետ, եթե 20 օրից ընտրվեք, այդ պրոբլեմը լուծվելո՞ւ է, ո՞նց։ Ի՞նչ 20 օր համբերեք, ձյո՞ւն է եկել, պիտի հալվի՞։

Պատկերացնո՞ւմ եք հազարավոր մարդիկ, ովքեր բանկերից վարկեր են վերցրել, գրավ են դրել իրենց տունը՝ տնտեսությունը զարգացնելու նպատակով, կանգնած են մեծ խնդրի առաջ»։