«Անձրևը խափանել է Բաքվում Համաշխարհային քաղաքային զարգացման ֆորումի բացման արարողությունը». #Jamnews

Մայիսի 17-ին Բաքվի Օլիմպիական մարզադաշտում ավելի քան 180 երկրի ներկայացուցիչներ, ճարտարապետներ, քաղաքաշինարարներ և ՄԱԿ-ի ներկայացուցիչներ սպասում էին Համաշխարհային քաղաքային զարգացման13-րդ ֆորումի (WUF-13) բացմանը։ Սակայն եղանակը փոխեց արարողության ընթացքը․ ուժեղ անձրևը ընդհատեց բացման ծրագրի մի մասը, իսկ մասնակիցները ստիպված եղան պատսպարվել ծածկերի տակ, գրում է Jamnews-ը։ Բաքվում Քաղաքային զարգացման համաշխարհային համաժողովի խորհրդանշական բացումը, որը նախատեսված է եղել բաց երկնքի տակ (մասնավորապես՝ դրոշի բարձրացման արարողությունը), համընկել է ռեկորդային տեղումների հետ։

«Ապահովել աշխարհը ապաստանով. անվտանգ և կայուն քաղաքներ ու համայնքներ» կարգախոսով անցկացվող համաժողովի համար դժվար է պատկերացնել ավելի խորհրդանշական սկիզբ։ Մինչ մասնակիցները քննարկում են կայուն ու անվտանգ քաղաքների թեման, Ադրբեջանի մայրաքաղաքը կրկին հայտնվել է հորդառատ անձրևի տակ, կրկին վերադառնալով հին հարցին. արդյո՞ք Բաքուն իրականում կայուն է։