Իրանը նախազգուշացրել է ԱՄՆ-ի և Իսրայելի նոր ագրեսիայի հետևանքների մասին

«Իրանը կընդլայնի ռազմական գործողությունները «նոր մարտադաշտերում», եթե ԱՄՆ-ն և Իսրայելը վերսկսեն ագրեսիան Իսլամական Հանրապետության դեմ»,- հայտարարել է Իրանի Զինված ուժերի պաշտոնական ներկայացուցի Մոհամմադ Աքրամինիան։

«Եթե թշնամին կրկին սխալ հաշվարկներ կատարի և ագրեսիա սկսի Իրանի դեմ, ապա անխուսափելիորեն կհանդիպի նոր և անսպասելի մեթոդների: Այդ մեթոդները ներառում են ավելի նոր և ավելի առաջադեմ սարքավորումներ, պատերազմի նոր մեթոդներ և, ամենակարևորը՝ նոր մարտադաշտեր: Այլ կերպ ասած, պատերազմը կծավալվի այնպիսի վայրերում, որոնք թշնամին չէր կարող կանխատեսել կամ հաշվի առնել իր ծրագրերում», - Աքրամինիայի խոսքերն է մեջբերում Tasnim լրատվական գործակալությունը:
Նա նաև նշել է, որ ԱՄՆ-ի հետ հրադադարի ընթացքում Իրանը ձգտել է ամրապնդել իր ռազմական հզորությունը, թարմացնել թիրախների ցանկը, մարտական ​​պատրաստությունը հարմարեցնել նոր պայմաններին, վերանորոգել իր պաշտպանական և հարձակողական զենքերը և իրականացնել անհրաժեշտ վերաբաշխումներ։