«Թեհրանը մերժում է Հորմուզի նեղուցի վերաբերյալ եվրոպական նախաձեռնությունները»․ Իտալիայում Իրանի դեսպան

Իրանի համար Հորմուզի նեղուցում ցանկացած օտարերկրյա ներկայություն, այդ թվում ՝ եվրոպական կոալիցիայի, անընդունելի է։ Այս մասին ТАСС-ին տված հարցազրույցում ասել է Իտալիայում Իրանի դեսպան Մոհամմադ Ռեզա Սաբուրին։

«Իրանի Իսլամական Հանրապետության տեսանկյունից Հորմուզի նեղուցում ցանկացած օտարերկրյա միջամտություն կամ ներկայություն անընդունելի է։ Սա վերաբերում է նաև վերջին ծրագրերին և հայտարարություններին, որոնք ներկայացվել են որպես Մեծ Բրիտանիայի և Ֆրանսիայի, ինչպես նաև եվրոպական կոալիցիայի նախաձեռնություններ: Իրանը մերժում և դատապարտում է այդ ծրագրերն ու գործողությունները, համարում է դրանք անընդունելի»,- ասել Է դիվանագետը։ Նա եվրոպական երկրներին կոչ է արել ուշադրություն դարձնել ներկա իրավիճակի արմատական պատճառներին, այն է՝ ԱՄՆ-ի և Իսրայելի ագրեսիան Իրանի դեմ:

«Մենք կարծում ենք, որ նավագնացության խոչընդոտները վերացնելու միակ միջոցը ափամերձ պետության, մասնավորապես՝ Իրանի, ինքնիշխանությունն ու տարածքային ամբողջականությունը հարգելն է, ինչպես նաև քաղաքական ճնշում գործադրելը ԱՄՆ-ի և սիոնիստական ​​ռեժիմի վրա, որպեսզի նրանք զերծ մնան իրենց ագրեսիայի կրկնությունից և պահպանեն հրադադարը»,- հավելել է դեսպանը։

Նրա խոսքով՝ ցանկացած նախաձեռնություն պետք է իրականացվի Իրանի համաձայնությամբ և նրա հետ համակարգմամբ: Նա նաև նշել է, որ եվրոպական երկրները անտեսում են միջազգային իրավունքի և ՄԱԿ-ի կանոնադրության ակնհայտ խախտումները՝ ԱՄՆ-ի և Իսրայելի անօրինական ագրեսիայից հետո։