«Հարությունը հիշեցնում է՝ եթե ինչ-որ բան ճիշտ է ու արժեք ունի, նրա պարտությունը վերջնական չէ». Դավիթ Սանասարյան

«Ինքնիշխան Հայաստան» կուսակցության նախագահ Դավիթ Սանասարյանի ֆեյսբուքյան գրառումը. «Սուրբ Զատիկը շատերս նշում ենք որպես զուտ եկեղեցական տոն, այն մեզ համար ընտանիքով ու հարազատներով հավաքվելու լավ առիթ է։ Բայց մի՞թե խորությամբ հասկանում ենք իմաստը։ Մի պահ կանգ առնենք ու պարզ հարց տանք մեզ․ ի՞նչ է իրականում նշանակում Հարությունը, ի՞նչ խորհուրդ ունի։
Իմ համար դա մի բան է հիշեցնում՝ կյանքում շատ արագ ենք հիասթափվում ու «վերջ» ասում։ Մի անհաջողություն, մի հարված, մի փակ դուռ… ու մենք ներսում արդեն եզրակացնում ենք՝ վերջ, սա էլ վերջացավ։ Բայց իրականում շատ դեպքերում դա վերջ չէ, երբեմն դա պարզապես ծանր փուլ է։
Հարությունը նաև հիշեցնում է, որ եթե ինչ-որ բան ճիշտ է ու արժեք ունի, նրա պարտությունը վերջնական չէ։
Ժամանակը հաճախ խաբում է՝ ստեղծելով տպավորություն, թե սխալն է հաղթում։ Բայց դա պարզապես ընթացքի մի պահ է, ոչ արդյունքը։
Ու ամենակարևորը՝ նոր սկիզբը հեշտ բան չէ։ Մենք հաճախ ուզում ենք նոր ու ավելի լավ կյանք, բայց առանց ընդունելու մեր սխալները, առանց անցնելու մեր դժվարությունների միջով։ Այդպես չի լինում։ Իրական փոփոխությունը գրեթե միշտ ինչ-որ բանից հրաժարվելու, վերանայելու, նորից կառուցելու ու ստեղծելու գործընթաց է։
«Եթե ցորենի հատիկը, հողի մեջ ընկնելով, չմեռնի, միայն հատիկն ինքը կմնա, իսկ եթե մեռնի, բազում արդյունք կտա:» (Հովհաննես 12:24-25)
Միգուցե քեզ մոտ էլ կա մի բան, որը վաղուց փակված էջ ես համարում։
Գուցե դա հենց այն «հատիկն» է, որը դեռ պետք է իր իրական պտուղը տա։
Շնորհավոր Սուրբ Հարության տոնը, օրհնյալ է հարությունը Քրիստոսի»: