«Սա «Մաշտոցի պուրակն է», որտեղ չմտավ Սերժ Սարգսյանն ու չասեց՝ սիրուն չի՝ Տարոն». Գևորգ Թոսունյան

Լրագրող Գևորգ Թոսունյանը ֆեյսբուքյան իր էջում լուսանկար է հրապարակել՝ կից գրելով․ «Նայեք, սա «Մաշտոցի պուրակն է», որտեղ չմտավ Սերժ Սարգսյանն ու չասեց՝ սիրուն չի՝ Տարոն, այստեղ չմտավ նաև այն քաղհասարակությունը կամ նրա ժառանգորդը կամ մեկ ուրիշ երիտասարդ, որ կասեր՝ էս ի՞նչ եք անում, տո բուծիկ էլ չէ, շենք եք մեր այգում սարքում։
Երևանի քաղաքապետարանի հարևանությամբ Կիրովի անվան մանկական այգին է։ Ավագանու ընդդիմադիր «Ազգային առաջընթաց» խմբակցության ղեկավար Արամ Թորոսյան ցույց է տալիս այգու տարածքում վերջին տարիներին կառուցված նոր քարե շենքերը։ Տարածքը դեռ 2002-ից վարձակալում է «Սատուրն-Ա» ընկերությունը, որը պատկանում է Քաղաքաշինության կոմիտեի նախկին նախագահ Արմեն Ղուլարյանի ընտանիքին։ Ու մինչ նա պաշտոնավարում էր վարչապետի աշխատակազմում, քաղաքապետարանի աչքի առաջ՝ նրա ընտանիքին վարձակալությամբ տրված այս այգում, կառուցապատումը շարունակվում էր։
Այս պատկերը կտրուկ հակասության մեջ է Երևանի ոչ վաղ անցյալի հետ։ Քաղաքը ու դրա ակտիվիստները, որոնք ժամանակին ոտքի էին կանգնել Մաշտոցի պուրակի մի քանի տաղավարների կառուցման դեմ, հիմա կարծես անտարբեր հետևում են հանրային տարածքների «քարե զավթմանը»։ Այնտեղ, որտեղ տարիներ առաջ քաղաքացիական ըմբոստության հզոր ալիք էր, այսօր միայն լռություն է ու բետոնե նոր իրականություն»։