Իրանը հարվածել է Քուվեյթի ռազմական բազային

Քուվեյթի ռազմական բազայի վրա Իրանի կողմից հասցված հարվածի հետևանքով վիրավորվել է առնվազն 10 զինվոր։

Պաշտպանության նախարարության խոսնակ գնդապետ Սաուդ Ալ-Աթվանի խոսքով՝ Էմիրությունում գտնվող ռազմական ճամբարի վրա Իրանի կողմից հասցված հարվածի հետևանքով վիրավորվել է քուվեյթցի տասը զինծառայող։ «Վերջին 24 ժամվա ընթացքում զինված ուժերը Քուվեյթի օդային տարածքում հայտնաբերել են թշնամու 14 բալիստիկ հրթիռ և 12 անօդաչու թռչող սարք։ Ռազմական ճամբարներից մեկի վրա հասցված հարվածի հետևանքով 10 զինվոր վիրավորվել է և ստանում է անհրաժեշտ բժշկական օգնություն։ Հաստատությունում նաև նյութական վնաս է գրանցվել»,- ասվում է խոսնակի կողմից Քուվեյթի գլխավոր շտաբի կայքում հրապարակված հայտարարության մեջ։

Ալ-Աթվանը հավելել է, որ հարձակումը թիրախավորել է նաև մասնավոր լոգիստիկ ընկերության պահեստները՝ պատճառելով նյութական վնաս, բայց զոհեր չկան։ Պաշտպանության նախարարության թարմացված տվյալների համաձայն՝ փետրվարի 28-ից ի վեր Քուվեյթի զինվորականները երկրի օդային տարածքում հայտնաբերել են ընդհանուր առմամբ 307 բալիստիկ հրթիռ և 2 թևավոր հրթիռ, ինչպես նաև 616 անօդաչու թռչող սարք։