«23 տարի առաջ ԱՄՆ-ի մեկ այլ վարչակազմ մեզ ներքաշեց Մերձավոր Արևելքում պատերազմի մեջ»․ Իսպանիայի վարչապետ

Իսպանիայի վարչապետ Պեդրո Սանչեսը Իրանի շուրջ ներկայիս հակամարտությունը համեմատել է 2003 թվականի Իրաքյան պատերազմի հետ։

«Աշխարհը, Եվրոպան և Իսպանիան նախկինում էլ են անցել այս ամենի միջով։ 23 տարի առաջ ԱՄՆ-ի մեկ այլ վարչակազմ մեզ ներքաշեց Մերձավոր Արևելքում պատերազմի մեջ: Պատերազմ, որը, տեսականորեն, պետք է մղվեր Սադամ Հուսեյնի զանգվածային ոչնչացման զենքը վերացնելու, ժողովրդավարություն հաստատելու և համաշխարհային անվտանգությունն ապահովելու համար»,- նշել է նա՝ հավելելով, որ Իրաքում պատերազմը հանգեցրել է ահաբեկչության աճի, միգրացիոն ճգնաժամի և էներգակիրների գների աճի։ Սանչեսի խոսքով՝ ներկայիս սրացումն էլ արդեն իսկ լուրջ հետևանքներ ունի։

Ավելի վաղ ԱՄՆ-ի նախագահ Դոնալդ Թրամփը հայտարարել էր «Իսպանիայի հետ ամբողջ առևտուրը դադարեցնելու» իր ցանկության մասին՝ Իսպանիայի կողմից ԱՄՆ-ին իր տարածքում գտնվող ավիաբազաներին հասանելիություն տալու մերժման ֆոնին։