«Մինչև ե՞րբ են մեր տնտեսվարողները կաշառքի դիմաց Վրաստանի սահմանով անցնելու». Գառնիկ Դանիելյան

«Տարիներով մեր տնտեսվարողները, բեռնափոխադրողները պրոբլեմների առաջ են կանգնում Վրաստանում: Նրանք ասում են, որ Վրաստանի իշխանությունները շատ դեպքերում բեռների անխոչընդոտ տեղափոխման հարցերը լուծում են նյութական շահագրգռվածության դիմաց»,- դիմելով Էկոնոմիկայի նախարար Գևորգ Պապոյանին՝ ասաց ընդդիմադիր պատգամավոր Գառնիկ Դանիելյանը՝ հարցնելով, թե մինչև ե՞րբ են մեր տնտեսվարողները կաշառքի դիմաց Վրաստանի սահմանով անցնելու: Նախարարն ասաց, որ այդ հարցով դիմել է իրավապահներին, սակայն որևէ մեկը չի եկել, ասել, որ այդպիսի բան է եղել. «Ֆեյսբուքյան իմ էջում հարյուրավոր մարդիկ էդպիսի բան են գրել, դիմել եմ իրավապահներին, նրանք՝ այդ մարդանց, բայց չի գտնվել մի հոգի, որ հաստատի իր գրածը»: Ընդդիմադիր պատգամավորն արձագանքեց. «Դուք հանդիպում նշանակեք, ես էդ մարդկանց ձեռքից բռնած՝ կբերեմ ձեզ մոտ»: