«Հավանականություն չկա, որ ԱՄՆ-ն կներքաշվի Մերձավոր Արևելքում երկարատև պատերազմի մեջ»․ Վենս

ԱՄՆ փոխնախագահ Ջեյ Դեյ Վենսը վստահություն է հայտնել, որ ԱՄՆ-ի հնարավոր հարվածը Իրանին չի հանգեցնի Մերձավոր Արևելքում երկարատև հակամարտության։

«Պատկերացումը, որ մենք տարիներ շարունակ պատերազմելու ենք Մերձավոր Արևելքում՝ առանց տեսանելի ավարտի, ոչ մի հավանականություն չկա, որ դա տեղի կունենա»,- նշել է նա՝ The Washington Post-ին տված հարցազրույցում։ Ինչպես նշում է լրատվամիջոցը, Վենսը քննարկել է Իրանի վրա ԱՄՆ-ի հնարավոր հարվածի հետևանքները։ Նա հասկացրել է, որ Վաշինգթոնի վարչակազմը չի բացառում նման քայլերը։

Վենսի խոսքով՝ ԱՄՆ նախագահ Դոնալդ Թրամփի կողմից դիտարկվող տարբերակների թվում են ռազմական գործողությունները՝ «ապահովելու համար, որ Իրանը միջուկային զենք չունենա» և խնդրի լուծումը «դիվանագիտական ճանապարհով»։