Ավստրիացի լեռնագնացը դատապարտվել է փոթորկի ժամանակ ընկերուհուն լեռան վրա միայնակ թողնելու համար

Ավստրիայի դատարանը մի որոշում է կայացրել, որը կարող է փոխել լեռնագնացության կանոններն ամբողջ աշխարհում։ Լեռնագնաց Թոմասին մեղավոր են ճանաչել իր ընկերուհու՝ 33-ամյա Քերսթինի մահվան համար։ Տղամարդն ուժեղ բուքի ժամանակ աղջկան մենակ է թողել սարի լանջին ու հեռացել։
Դեպքը եղել է 2025-ի հունվարին Ավստրիայի ամենաբարձր սարի՝ Գրոսգլոկների վրա։ Զույգը չի հասցրել ժամանակին գագաթ հասնել, բայց Թոմասը հետ չի կանգնել, նույնիսկ երբ եղանակը խիստ վատացել է, ու Քերստինն էլ ուժասպառ է եղել։ Գագաթին հասնելուն ընդամենը 50 մետր է մնացած եղել, երբ տղան որոշել է աղջկան թողնել այնտեղ ու մենակ գնալ օգնության հետևից։ Ցավոք, մինչև փրկարարները տեղ են հասել, Քերսթինն արդեն մահացած է եղել ցրտահարությունից:
Դատի ժամանակ մանրամասներ են պարզվել։ Թոմասն աղջկան նույնիսկ չի ծածկել տաք ծածկոցով, որը հենց Քերսթինի ուսապարկում է եղել։ Բացի այդ, նա մինչև մթնելը ոչ մեկին չի զանգել ու օգնության չի կանչել, նույնիսկ չի փորձել նշան տալ գլխավերևով անցնող փրկարար ուղղաթիռին։
Այս գործը քննել է մի դատավոր, ով ինքն էլ փորձառու լեռնագնաց է։ Նա ասել է, որ քանի որ տղան շատ ավելի պատրաստված ու փորձառու է եղել, հենց ինքն էլ պատասխանատու էր իր ընկերուհու կյանքի համար։ Հետաքրքիր է նաև, որ տղայի նախկին ընկերուհին էլ է դատարանում ցուցմունք տվել. պարզվում է՝ 2023-ին Թոմասը նրան էլ է նույն ձևով մենակ թողել սարի վրա ու հեռացել։
Դատարանը լեռնագնացին տվել է 5 ամսվա պայմանական պատիժ ու նշանակել մոտ 9400 եվրո տուգանք։ Թոմասը իրեն մեղավոր չի համարել, միայն ասել է, որ շատ է ցավում Քերսթինի մահվան համար։
Այս դեպքը կարևոր է նրանով, որ հիմա բոլորը կիմանան՝ սարերում ընկերոջը մենակ թողնելը ոչ միայն սխալ է, այլև կարող է պատժվել օրենքով։