«ԱՄՆ-ն ու Իրանը պատրաստ են փոխզիջումների միջուկային համաձայնագրի շուրջ»․ Ֆիդան

Թուրքիայի արտաքին գործերի նախարար Հաքան Ֆիդանը Financial Times-ին տված հարցազրույցում հայտարարել է, որ ԱՄՆ-ն և Իրանը, կարծես թե, պատրաստ են փոխզիջումների գնալ միջուկային համաձայնագրի շուրջ։

Նրա խոսքով, Վաշինգթոնը կարող է հրաժարվել ուրանի հարստացման ամբողջական դադարեցման պայմանից և համաձայնել հարստացմանը սահմանված շրջանակներում։ Նախարարը դա դրական զարգացում է համարել և հավելել, որ կարծում է Թեհրանը կընդունի հարստացման մակարդակի սահմանափակումներ և խիստ վերահսկման ռեժիմ։

«Իրանցիներն այժմ գիտակցում են, որ պետք է համաձայնության գան ամերիկացիների հետ, և ամերիկացիները հասկանում են, որ իրանցիներն ունեն իրենց սահմանները։ Անիմաստ է փորձել նրանց ստիպել», - հավելել է Ֆիդանը։

Նա զգուշացրել է, որ եթե ԱՄՆ-ն «պնդի բոլոր հարցերը միաժամանակ քննարկել»՝ Իրանի բալիստիկ հրթիռային զինանոցի և տարածաշրջանային զինված խմբերին աջակցությանը վերաբերյալ, «վախենում եմ, որ նույնիսկ միջուկային հարցը առաջ չի գնա… արդյունքը կարող է լինել մեկ այլ պատերազմ տարածաշրջանում»: