«ԱՄՆ-ի փոխնախագահ Ջեյ Դի Վենսի` Հայաստան այցից առաջ Ռուսաստանը երկու ուղերձ է հղում Երևանին». Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը․ «ԱՄՆ փոխնախագահ Ջեյ Դի Վենսի Հայաստան այցից առաջ Ռուսաստանը երկու ուղերձ է հղում Երևանին․ մի կողմից՝ խոսում է TRIPP-ին «միանալու» մասին, մյուս կողմից՝ առաջարկում է Հայաստանում կառուցել նոր ատոմային էներգաբլոկ։ Սա պատահական համընկնում չէ։
Ատոմակայանը պարզապես շինարարություն չէ։ Դա տասնամյակների կախվածություն է՝ վառելիք, սպասարկում, պահեստամասեր, ֆինանսավորում, վարկեր, ապահովագրություն, անվտանգային համակարգեր։ Եվ ռուսական մոդելում այդ ամբողջ շղթան մշտապես վերածվում է քաղաքական ու տնտեսական ճնշման գործիքի։
Վերջին երեսուն տարում Ռուսաստանը որպես հիմնական կապալառու լիարժեք շահագործման է հասցրել միայն մեկ նոր ԱԷԿ՝ Բելառուսում։ Իրանում և Չինաստանում, Հնդկաստանում ռուսները միայնակ կարողացել են ավարտել միայն համատեղ նախագծեր։
Թուրքիայում Աքքույուն արդեն ութ տարի է կառուցվում, բայց դեռ շահագործման չի հանձնվել՝ տեխնոլոգիական, ֆինանսական ու միջազգային սահմանափակումների պատճառով։ Երբ կախված ես մեկ կենտրոնից, ամեն ուշացում դառնում է լծակ։
Երևանն արդեն հստակ հայտարարել է իր ռազմավարական ընտրությունը․ Մեծամորի ԱԷԿ-ին պետք է փոխարինի մոդուլային ատոմակայան։ Մեր համոզմամբ այն պետք է կառուցվի Միացյալ Նահանգների հետ։
Ռուսական առաջարկը այսօր հնչում է հետևյալ տրամաբանությամբ․ եթե ուզում եք, որ գործող ԱԷԿ-ի կյանքը երկարաձգվի, պետք է մեզ հանձնեք նաև նորի կառուցման իրավունքը։ Սա հենց այն կարմիր գիծն է, որտեղից պետությունը պետք է հետ քաշվի։
ԱՄՆ-ը ունի խորհրդային շրջանում կառուցված ատոմային էներգաբլոկների արդիականացման մեծ փորձ Արևելյան Եվրոպայում։ Գործող կայանի վերանորոգումը և նորի կառուցումը պետք է իրականացվեն այդ փորձի և բազմաղբյուր տեխնոլոգիաների վրա հիմնված մոդելով։
Անկախ պետությունն իր էներգետիկ ապագան չի կառուցում շանտաժով։ Էներգետիկան ինքնիշխանություն է, իսկ ինքնիշխանությունը շանտաժի առարկա չէ»։