«Իսրայելը թունավոր նյութեր է ցողում Հարավային Լիբանանի վրա»․ Նիզար Հանի

Իսրայելի ավիացիան մեծ քանակությամբ թունավոր նյութեր է ցողում Հարավային Լիբանանի տարածքի վրա, ինչի հետևանքով ոչնչացվում է բուսականությունը և բացասաբար ազդում մարդկանց առողջության վրա։ Այդ մասին համաարաբական Asharq Al Awsat թերթին տված հարցազրույցում հայտարարել է հանրապետության գյուղատնտեսության նախարար Նիզար Հանին։

«Վտանգավոր քիմիական նյութերի ինտենսիվ կիրառումը նպատակ ունի մոտ ապագայում հողը ոչ պիտանի դարձնել մշակման համար և այդ կերպ խոչընդոտել բնակիչների վերադարձը հարավային շրջաններ», - նշել է գերատեսչության ղեկավարը։ Նրա խոսքով՝ լաբորատոր հետազոտությունների արդյունքները ցույց են տվել, որ ցողվող նյութը ոչ սելեկտիվ հերբիցիդ է՝ գլիֆոսատի տեսակի։ «Դրա ազդեցությունը որպես քաղցկեղածին նյութ ծայրահեղ վտանգավոր է բուսական միջավայրի համար և բացասաբար է անդրադառնում մարդու առողջության վրա», - հայտարարել է նախարարը։

Ավելի վաղ Լիբանանի նախագահ Ջոզեֆ Աունը կոչ էր արել ՄԱԿ-ի Անվտանգության խորհրդին միջոցներ ձեռնարկել Իսրայելի բնապահպանական ագրեսիայի դեմ՝ նշելով, որ «այս հանցավոր գործողությունների արդյունքում սահմանամերձ գյուղերի բնակիչները մնում են առանց ապրուստի միջոցների»։

Իր հերթին, Լիբանանում ՄԱԿ-ի ժամանակավոր ուժերի (UNIFIL) հրամանատարությունը հայտարարության մեջ պահանջել էր, որ Իսրայելը «դադարեցնի քաղաքացիական բնակչության առողջությանը սպառնացող քիմիական նյութերի ցողումը»։