Իրանը հայտնում է, որ իր ԱԹՍ-ն կատարել է իր բոլոր առաքելությունները, մինչև անհետանալը

Իրանի Իսլամական հեղափոխության պահապանների կորպուսի (զինված ուժերի էլիտար ստորաբաժանում) անօդաչու թռչող սարքը (ԱԹՍ) հաջողությամբ կատարել է բոլոր առաջադրանքները և փոխանցել անհրաժեշտ տեղեկատվությունը, նախքան դրա հետ կապը կորցնելը, հաղորդում է Tasnim լրատվական գործակալությունը՝ հղում անելով աղբյուրին։

Ավելի վաղ ԱՄՆ-ի Կենտրոնական հրամանատարության խոսնակ, կապիտան Թիմ Հոքինսը հայտարարել էր, որ ամերիկյան F-35C կործանիչը խոցել է իրանական ԱԹՍ-ն, երբ այն մոտեցել է USS Abraham Lincoln ավիակիրին Արաբական ծովում։

Tasnim-ի աղբյուրի փոխանցմամբ՝ Իրանի իշխանությունները ներկայումս չեն կարողանում որոշել ԱԹՍ-ի հետ կապի կորստի պատճառը, և այն հետաքննվում է։ Այնուամենայնիվ, աղբյուրը նշել է, որ Shahed-129 ԱԹՍ-ն հետախուզություն և լուսանկարչություն էր իրականացնում բաց ջրերում՝ իր բնականոն և օրինական առաքելության շրջանակներում։