Գերմանիայի Deutsche Bank-ում խուզարկությունները կարող են կապված լինել Աբրամովիչի հետ

Գերմանիայում հետաքննություն է ընթանում երկրի խոշորագույն բանկի՝ Deutsche Bank-ի դեմ: Հնարավոր փողերի լվացման հետաքննության շրջանակներում արդարադատության մարմինները խուզարկություններ են անցկացնում բանկի շենքերում՝ Մայնի Ֆրանկֆուրտում և Բեռլինում, հաղորդում է Der Spiegel-ը՝ հղում անելով Ֆրանկֆուրտի դատախազությանը:

Suddeutsche Zeitung թերթը հաղորդում է, որ հետաքննությունը կարող է կապված լինել ռուս միլիարդատեր Ռոման Աբրամովիչի հետ, ում, ըստ նախկինում հրապարակված նյութերի, Ֆրանկֆուրտի դատախազությունը հետաքննում է երկար ժամանակ:

Հետաքննությունը վարում է Ֆրանկֆուրտի տնտեսական հանցագործությունների դատախազությունը՝ համագործակցելով Գերմանիայի դաշնային քրեական ոստիկանության գրասենյակի (BKA) հետ: BKA-ի տվյալներով՝ կասկածի տակ են անհայտ պատասխանատու անձինք և բանկի աշխատակիցներ: Հետաքննությունը բխում է Deutsche Bank-ի նախկին գործարար հարաբերություններից արտասահմանյան ընկերությունների հետ, որոնք իրենք էլ կասկածվում են փողերի լվացման մեջ:

Deutsche Bank-ը հաստատել է հետաքննությունը՝ հայտարարելով իրավապահ մարմինների հետ իր լիակատար համագործակցության մասին: Բանկը նախկինում բախվել է կարգավորող մարմինների մտահոգությունների՝ փողերի լվացման դեմ պայքարի միջոցառումների վերաբերյալ. մասնավորապես, ֆինանսական վերահսկող մարմինը հատուկ հանձնակատար է ուղարկել վարկային հաստատություն՝ համապատասխան պահանջների պահպանումը վերահսկելու համար: