««Հեզբոլլահը» չի մնա չեզոք Իրանի վրա ամերիկյան հարձակման դեպքում». Նաիմ Քասեմ

Շիաական «Հեզբոլլահ» կազմակերպությունը կձեռնարկի բոլոր անհրաժեշտ միջոցները՝ Իրանին և նրա ղեկավարությանն ուղղված ամերիկյան սպառնալիքին հակազդելու համար։ Այս մասին հայտարարել է շարժման գլխավոր քարտուղար շեյխ Նաիմ Քասեմը՝ Բեյրութում «Ալ Մանար» հեռուստաընկերությամբ հեռարձակված՝ Իսլամական Հանրապետության հետ համերաշխության հանրահավաքի մասնակիցներին ուղղված հեռուստատեսային ելույթում։

«Իրանի դեմ ԱՄՆ-ի սպասվող ագրեսիայի առջև մենք վճռականորեն տրամադրված ենք պաշտպանվելու և մեր գործողությունների ընթացքը կընտրենք համապատասխան պահին. «Հեզբոլլահը» չի մնա չեզոք ամերիկյան հարձակման դեպքում», - ընդգծել է քաղաքական գործիչը։

Ինչպես նշել է շեյխ Քասեմը, Միացյալ Նահանգները և Իսրայելը «չեն ցանկանում հանդուրժել Իսլամական Հանրապետության գոյությունը՝ որպես ազատ և անկախ երկիր, որը փարոս է միլիոնավոր մահմեդականների և աշխարհի ճնշված ժողովուրդների համար»։

«Հեզբոլլահի» առաջնորդը զգուշացրել է, որ «այս անգամ Իրանի դեմ պատերազմը կբորբոքի հակամարտության կրակը ամբողջ տարածաշրջանում»։