«Խաղաղության համաձայնագրի որոշ փաստաթղթեր արդեն պատրաստ են»․ Զելենսկի

Խաղաղության համաձայնագրի որոշ փաստաթղթեր արդեն պատրաստ են։ Այս մասին հայտնում է РБК-Украина-ն՝ հղում կատարելով Ուկրաինայի նախագահ Վլադիմիր Զելենսկու երեկոյան ուղերձին։

Զելենսկին նշել է, որ երեկ՝ դեկտեմբերի 25-ին մեկ ժամ տևողությամբ զրույց է անցկացրել ԱՄՆ նախագահ Դոնալդ Թրամփի հատուկ բանագնացներ Սթիվ Ուիթքոֆի և Թրամփի փեսա Ջարեդ Քուշների հետ։

«Եվ դա իսկապես լավ զրույց էր․ շատ մանրամասներ կային, լավ գաղափարներ, որոնք քննարկել ենք։ Մենք նաև որոշ նոր գաղափարներ ունենք, թե ինչպես մոտեցնել իրական խաղաղությունը, և դա վերաբերում է ձևաչափերին, հանդիպումներին և, անշուշտ, ժամանակացույցին»,- նշել է նա։

Զելենսկու խոսքով խաղաղության համաձայնագրի որոշ փաստաթղթեր արդեն պատրաստ են։ «Իհարկե, զգայուն հարցերը դեռ որոշակի աշխատանքի կարիք ունեն։ Բայց ամերիկյան թիմի հետ միասին հասկանում ենք, թե ինչպես ապահովել այդ ամենը»,- հավելել է Զելենսկին։