Գրետա Թունբերգը ձերբակալվել է «Հակաահաբեկչական օրենքը» խախտելու համար

Ինչպես հայտնել ենք, բրիտանական ոստիկանությունը Լոնդոնում պաղեստինամետ բողոքի ակցիայի ժամանակ ձերբակալել է շվեդ կլիմայական ակտիվիստ Գրետա Թունբերգին:
Սոցիալական ցանցերում տարածվել է տեսանյութ, որտեղ Թունբերգը նստած է փողոցում՝ ձեռքին պաստառ, որով աջակցություն է հայտնում «Պաղեստինյան գործողություն» կազմակերպությանը, որը Մեծ Բրիտանիայի կառավարության կողմից ճանաչվել է՝ որպես ահաբեկչական կազմակերպություն, և որը կապված է բանտարկյալների հետ։

Ոստիկանը մոտենում է նրան և վերցնում պաստառը։ Թունբերգը ձերբակալվել է «Հակաահաբեկչական օրենքը» խախտելու համար։

Մետրոպոլիտենի ոստիկանության մամուլի ծառայությունը հաստատել է 22-ամյա կնոջ ձերբակալությունը։ «Նա ձերբակալվել է արգելված կազմակերպությանը (այս դեպքում՝ «Պաղեստինյան գործողություն») աջակցելու առարկա (այս դեպքում՝ պաստառ) ցուցադրելու համար՝ խախտելով 2000 թվականի «Ահաբեկչության մասին» օրենքի 13-րդ հոդվածը»,- ասվում է հայտարարության մեջ։

Մետրոպոլիտենի ոստիկանության տվյալներով՝ Պաղեստինի աջակցության բողոքի ակցիան սկսվել է դեկտեմբերի 23-ի առավոտյան։ Ժամը 7:00-ի սահմաններում (Երևանի ժամանակով՝ 11:00) ակտիվիստները ներկ են նետել Ֆենչըրչ փողոցի շենքի վրա։ Իրավապահ մարմինները ձերբակալել են 24-ամյա մի տղամարդու և 38-ամյա մի կնոջ՝ «գույքը վնասելու կասկածանքով»։