Թրամփը Գրենլանդիայի հարցերով ԱՄՆ հատուկ բանագնաց է նշանակել

ԱՄՆ նախագահ Դոնալդ Թրամփը հայտնել է, որ Լուիզիանայի նահանգապետ Ջեֆ Լենդրիին նշանակել է Գրենլանդիայի հարցերով իր հատուկ բանագնաց։ Նա այս մասին գրել է TruthSocial-ի իր էջում։

«Ջեֆը հասկանում է, որ Գրենլանդիան կենսական նշանակություն ունի մեր ազգային անվտանգության համար և վճռականորեն կպաշտպանի մեր երկրի շահերը՝ հանուն մեր դաշնակիցների և, իհարկե, ամբողջ աշխարհի ապահովության և անվտանգության»,- գրել է Թրամփը։

Թրամփը մի քանի անգամ նշել է, որ Գրենլանդիան (դանիական տարածք, որը մեծ մասամբ ինքնակառավարվում է), պետք է դառնա Միացյալ Նահանգների մաս՝ վկայակոչելով անվտանգության նկատառումները և կղզու հանքային պաշարների նկատմամբ հետաքրքրությունը։ Լանդրին կողմ է արտահայտվել այդ գաղափարին։

«Նախագահ Դոնալդ Ջ. Թրամփը միանգամայն ճիշտ է։ Մենք պետք է անենք այնպես, որ Գրենլանդիան միանա Միացյալ Նահանգներին»,- գրել է Լանդրին հունվարի 9-ին X սոցիալական ցանցում արված գրառման մեջ։

Գրենլանդիան և Դանիան մշտապես մերժել են այս առաջարկը։