«Թրամփը ձգտում է զավթել Վենեսուելայի ռեսուրսներն ու տարածքը»․ Մադուրո

Վենեսուելայի նախագահ Նիկոլաս Մադուրոն հայտարարել է, որ Դոնալդ Թրամփը բացահայտել է հարավամերիկյան երկրի նկատմամբ իր «իրական դրդապատճառները»՝ հայտարարելով, թե Վենեսուելան գողացել է ամերիկյան «նավթը, հողը և այլ ակտիվներ»։ Այս մասին հայտնում է CNN-ը։

«Դա պարզապես պատերազմ հրահրող և գաղութատիրական պատրվակ է, և մենք դա բազմիցս ասել ենք, իսկ հիմա բոլորը տեսնում են ճշմարտությունը։ Ճշմարտությունը բացահայտվել է»,- ասել է Մադուրոն։ «Նպատակը Վենեսուելայում ռեժիմի փոփոխությունն է՝ խամաճիկ կառավարություն հաստատելու համար, որը չի դիմանա նույնիսկ 47 ժամ, կհանձնի Սահմանադրությունը, ինքնիշխանությունն ու ամբողջ հարստությունը՝ Վենեսուելան վերածելով գաղութի։ Դա պարզապես երբեք տեղի չի ունենա»,- շարունակել է նա։

Նշենք, որ Թրամփը երեկ լրագրողներին ասել է, որ Վենեսուելան անօրինական կերպով խլել է «էներգետիկ իրավունքները», և որ ԱՄՆ-ն ուզում է դրանք վերադարձնել։

Ավելի վաղ ԱՄՆ-ն Վենեսուելայի մերձակայքում ռազմածովային ուժերի ավելացումը որակել էր որպես միջոց՝ ուղղված թմրանյութերի ապօրինի շրջանառության դեմ պայքարին։