«Գազայի խաղաղության խորհրդի կազմը կհայտարարվի 2026թ.-ի սկզբին». Թրամփ

«Խաղաղության խորհրդի» կազմը, որը կղեկավարի Գազայի հատվածը, կհայտարարվի 2026 թվականի սկզբին, դրանում կընդգրկվեն մի քանի երկրների ղեկավարներ: Այս մասին հայտարարել է ԱՄՆ նախագահ Դոնալդ Թրամփը:

«Մենք դա կանենք հաջորդ տարվա սկզբին», - ասել է Թրամփը՝ Սպիտակ տանը լրագրողների հարցերին պատասխանելու ժամանակ։ Նրա խոսքով մարմինը, որը, ինչպես սպասվում է, նախագահելու է հենց ինքը՝ Թրամփը, կդառնա «լեգենդար խորհուրդ»։ «Այն հիմնականում կազմված է լինելու ամենակարևոր երկրների պետությունների ղեկավարներից։ Նրանք բոլորը ցանկանում են լինել խորհրդում», - հավելել է Թրամփը։

«Իրականում դա նախատեսված չէր », - բացատրել է նա։ Թրամփը նշել է, որ սկզբում սպասվում էր, որ վերոնշյալ կառույցի անդամները կլինեն «ակնառու մարդիկ», ոչ թե պարտադիր պետությունների ղեկավարներ։ «Սակայն, կարծես, հենց այդպես է ստացվում։ Ղեկավարներ, թագավորներ, նախագահներ, վարչապետներ՝ նրանք բոլորը ցանկանում են լինել խորհրդում», - նշել է Թրամփը։